Pak Mertoyudho dokter gigi kondang soko desa Tjutuk Manuk Randublatung wis kaloko dadi dokter gigi sing mumpuni. Loro untu opo wae pasti cespleng, untu krowok, untu pecah, untu gapuk, untu berlubang pasti mari (sing baku dudu untu unto opo untu manuk cucakrowo). Isuk kuwi ketamon pak Kuntjung sing rambute koyo Ronaldo pemain bal soko Brasil sing juara bal-2-an sak donyo.
"Kulo nuwun pak dokter untu ..... eeehh dokter gigi."
"Monggo pak Kuntjung ... kulo aturi lenggah rumiyin"
Sak wise sak untoro wektu pak dokter metu karo nggowo uborampe.
"Sakit menopo pak ?" Takonne dokter Tarto
"Niki lho pak dokter ... untu kulo niki kok sedut2 senut penjenengan tingali rumiyin."
Sakwise diprikso doktere ngomong "Lah niki kedah dicabut pak"
"Pak dokter pinten ongkose ?" Takon pak Kuntjung nggenahke.
"Anu pak ... niki kenging arto go jing."
"Go jing niku pinten ?"
"Go jing ... niku gangsal ewu pak."
" Ngaten pak .... Nuwun sewu ... kulo namung gadah arto kalih ewu ingkang tigang ewu kulo sukani kalih mendo (wedus) kulo, dene mendo kulo reginipun satus seket ewu, mbenjing wulan ngajeng wedus kulo ingkang meteng meniko medal cempe nipun, pramilo kulo aturi ngetung rumiyin menggah saenipun, dados medalipun etangan pak dokter gadah utang dateng kulo satus patang puluh pitu ewu."
"Oooo....ngoten pak Kuntjung .... Mekaten kemawon, amrih saenipun untu pak Kuntjung ingkang ngandap kulo cabut gangsal, dene ingkang nginggil kulo cabut sedoyo, dene sisanipun bade kulo cabut benjing dalu, dados etanganipun impas, bapak mboten gadah utang kulo ugi mboten gadah utang"
Pak Kuntjung nesu, rai bang ma-wingo-2 kuping megar, cangkem ngiler.
"Lhadalah bojleng-bojleng moto mlorok ora ndedelok.......pak dokter kurang ajar, mosok kulo ompong ngaten. Wis, mendingan ora duwe wedus, katimbang mung iso ngemut thok. Gemblunk, opo???"
*pengirim : Antono Basuki
Label: bahasa jawa, dialog, sindiran
